Antzara muturzuria Inurritzan

Ansar careto grande en Inurritza. Autor Miren López

Bart arratsaldean, urriak 17, Itsas Enarako zenbait kide Zarauzko Inurritzan ginela, antzara ilun samar bat agertu zen hegan, hegoaldetik itxura, eta errekaren gainean itsaso alderantz pasa zen. Ez zirudien arrunta zenik, hegoak eta buru-lepoa, esan bezala, ilun samarrak baitzituen horretarako. Handik minutu pare batera itzuli zen eta inguruko larre batera jaitsi. Han luzez begiratu ahal izan genuen, belar artean jaten ari zen bitartean, eta lasai identifikatu. Anser albifrons antzara muturzuria zen. Gaur goizean, 09:15etan ere, han segitzen zuen, atseden hartzen etzanda.

Argazkian ikus daitekeenez, antzara arrunta baina zertxobait lirainagoa da, sabela halako orban beltzez jasota dauka eta kopeta eta mokoaren arteko lumak zuri-zuriak ditu. Horrexek ematen dio, hain zuzen, izena. Bestalde, lepo-burua eta hegoen gain-aldea hark baino ilunxeagoak ditu. Gainera, argazkian iksuten ez bada ere, hankak gorriak ditu.

Ansar careto grande, en Inurritza. Autor Héctor González

Antzara muturzuria oso espezie bakana da Iberian eta, urtero aleren bat edo beste hautematen den arren, urria da oso. Kanadan, AEBn, Groenlandian, Errusian eta Siberian umatzen da. Mendebaldeko Europara datozenak Groenlandiako eta Ipar Errusiako populaziokoak izan ohi dira, eta nagusiki Britainia Handian eta Irlandan, alde batetik, eta Ipar Itsasoko kostetan, bestetik, igarotzen dute negua.

Ansar careto grande, en uno de sus vuelos sobre Inurritza. Autor Héctor González

Bertan ziren: Dani Etxeberria, Miren Lopez Mendizabal, Pello Izkeaga, Rafa Saiz Elizondo eta Asier Aldalur

-----------------------------------------
PD: 2011-10-18an Juantxo Unzuetak (Arkamurka taldeko kideak) bideo-irudi batzuk egin zizkion antzarari. Halaber, 2011.10.19an, 11:43an ere, han zen larrean bazkatzen.