TXINGUDIN EKIN BEHINGOZ!!

(para leerlo en castellano visita nuestra web)

Txingudiko Plan berezia aplika dezatela exijitzeko mozio bat eztabaidatuko da datorren ostiralean, 27an, Irungo Udaleko Osoko Bilkuran. Ekimena Gipuzkoako talde naturazale, kontserbazionista eta ekologistek bultzatua da. Lehenago ere aipatu izan dugu blog honetan nola dagoen Txingudiren babesa: geldi-geldirik aspaldian, eta egoera tamalgarri horren erantzule nagusia Irungo Udala da.

Oraingoan Irungo alderdi politikoei postura hartzeko gonbita egin diegu.

Pistas de atletismo de Plaiaundi

Irun, 2013ko abenduaren 17a

Jaun/andere agurgarriak:

Eskutitz honekin batera igorri dizuegun dokumentua sinatzen dugun talde naturazaleek, ornitologikoek eta ekologistek aipatu dokumentua abenduko osoko bilkuran mozio bezala jorratzea eskatu diegu Irungo Udal Talde Politiko guztiei HAZen bidez erregistratutako eskariaren bidez (erregistro zenbakia: 30.225).

Bertan aipatzen eta eskatzen diren puntuak betetzea beharrezkoa dela pentsatzen dugu, izan ere, Eusko Jaurlaritzak, Gipuzkoako Foru Aldundiak eta Irun eta Hondarribiko Udalek Txingudiko hezeguneak babesteko eta lehengoratzeko hitzarmena sinatu zutenetik hogeita bat urte igaro badira ere, aipatu hitzarmenak zehazten dituen neurri asko oraindik bete gabe baitaude eta horrek naturagune horren egoera benetan kezkagarria izatea eragiten baitu.
  

IRUNGO UDALA: BETE DITZALA TXINGUDIKO PADURAK BABESTEKO LEGEAK

EHAAN argitaratu berri den ekainaren 4ko 356/2013 Dekretuan, “Txingudi-Bidasoa” Zaintza Bereziko Gunea (ZBG) izendatzen da eta hura eta "Txingudi” Hegaztientzako Babes Bereziko Gunea (HBBG) zaintzeko neurriak onesten dira, biak ere Red Natura 2000ren markoan.

Txingudiko hezeguneak nazioarteko araudi ugariren bidez babestuta daude, horietako batzuk nazioartekoak, bai Gipuzkoan, bai Lapurdin ere, habitaten eta fauna eta flora basatietako espezie basatien zaintza-egoera bermatzeko:

1. Hegaztientzako Babes Bereziko Gunea (HBBG)
2. Zaintza Bereziko Gunea (ZBG)
3. RAMSAR Hitzarmenean Nazioarteko Garrantzia duen Hezegunea.
4. Txingudiko Baliabideen Antolaketarako eta Babespenerako Plan Berezia.
5. Arrêté de Biotope.
6. Zone Naturelle d´Intérêt Écologique, Faunistique et Floristique (ZNIEFF).
7. Zone Importante pour la Conservation des Oiseaux (ZICO).

Bestalde, 2013ko uztailaren 18an, jakin dugu Irungo Udalak kirolgune batzuk konpontzeko lanak egin behar dituela eta, haien artean, "Plaiaundiko atletismoko pista" (Txingudi) aipatzen da.

Ez dugu ulertzen Irungo Udalaren jarrera; izan ere, atletismoko pista eta errugbiko zelaia baimentzen eta mantentzen jarraitzen du, nahiz eta aspaldi egon behar zuten beste leku egokiago batera lekualdatuak. Jarrera horrekin, Plaiaundiren leheneratze integrala oztopatzen ari da, eta atzeratu egiten ditu hegazti migratzaileentzat ingurunearen kalitatea nabarmen hobetuko luketen planak. Horrela, Plaiaundiko Parke Ekologikoa sortu eta kalifikatu zeneko funtzioa baliogabetzen ari da.

Bestalde, onartezina da gaur egun oraindik Bidasoko Irletan (Txingudiko Baliabideen Antolaketarako eta Babespenerako Plan Bereziaren barruan Erabateko Babespena duen gunea) kontrolik gabeko eta legez kanpoko nekazaritza-lanak inpunitatez burutzen uztea.

Bestaldetik, ulertezina da aipatu Plan Bereziak Oxinbiribil, Alunda eta Lastaolako ibai-ertzetarako onartutako Ingurumen Lehengoratze lanak gaur egun oraindik burutu gabe jarraitzea.

Txingudiko guneak berebiziko garrantzia du, Europako milaka hegazti migratzaileek leku hori baitute nahitaezko pasabide, atsedenleku eta babesleku.

Horregatik guztiagatik, honako hau ESKATZEN DIOGU Irungo Udalari:

1. Bete dezala indarrean dagoen legeria eta beste legezko leku batera alda ditzala Plaiaundiko atletismoko kirol-ekipamendua errugbi-zelaia, atletismoa eta errugbia baldintza egokietan egitea bermatuko duten instalazio duinak eraikiz, Irungo eta Hendaiako natur balioen zaintzan eragin gabe eta premiagabeko gatazkak sortu gabe.
2. Udal honek ganoraz har ditzala Txingudiko paduren kudeaketa eta haren babes-markoa eta Bidasoako irlen eremua giza erabilera eta presio orotatik aska dezala, bertako habitatak behar bezala egokituz, zaintzeko araudiak behartzen duen moduan. Era berean, Eusko Jaurlaritzarekin batera, gauza ditzala Oxinbiribil, Alunda eta Lastaolako ibaiertzen ingurumen lehengoratzea.
3. Bazter dezala hezeguneetara iristeko azpiegitura berrien eraikuntza, horrek suposatuko lukeen giza presioaren emendioak Txingudiko habiagintza-eremuetan eta fauna eta floraren babes funtzioan izan dezakeen kalteak direla eta.

 

• Bidasoaldeko Lagunak                                   
• Eguzki, erakunde antinuklear eta ekologista   
• Itsas Enara Ornitologia Elkartea                      
• Ekologistak Martxan                                       
• Haritzalde Natur Taldea                                    
• Berdeak
• Ugatza Ornitologia Elkartea                            
• Saiak
• Arkamurka Natur Elkartea                              
• Zumaia Natur Taldea                                     
• Zestoako Natur Taldea                                     
• Erkaxo, Azpeitiko Natur Taldea Ur-garden
• Mutriku Natur Taldea
• Okil Beltza Natur Taldea
• Osina Natur Taldea Landarlan Natur elkartea
• Herrio Natur Taldea
• Rios con vida
• Organbidexka Col Libre
• Groupe Ornithologique des Pyrénées et de l'Adour