Ehiza eta hotza: Itsas Enara Ornitologia Elkarteak GFA-ri eginiko eskaera

Donostian, 2009ko abenduaren 16an

Jaun/andre agurgarri horiek,

Erdialdeko Europa hotzaldi handia ari da pairatzen duela zenbait egun, eta haren bilakaera aurreikusteko erabiltzen diren eredu guztiek datozen egunetarako kondizioak are gogorrago bilakatuko direla iragarri dute.

Euskal Herrian ere antzekoa da egoera: egun luzeak daramatzagu dagoeneko hotzak eraginda, eta datozen egunetarako elurra kostaraino zabalduko dela iragarri da (ostiralean), ondoren tenperaturak areago jaitsiko direlarik larunbatean eta, batez ere, igandean. Honen bitartez eskatu nahi dizuegu ehiza xehea aldi baterako debekatu behar baldin baduzue, egoerak hala bultzatuta, has zaiteztela lehenbailehen egoera aztertzen, neurria garaiz hartzeko eta jakinarazteko, eraginkorra izango bada. Halaber, jakinaraz diezaiozuela Ertzaintzari zein diren halakoetan ehiztarien jokamolde deliktibo posibleak.

Ez dadila joan den urtekoa berriz errepika: neurria berandu hartu, hedapen mediatikorik apenas eman ez, eta legez kanpoko ehiztariak nonahi. Gogoan izan debekua automatikoa dela, arauaren arabera, elurra denean; tamalez, GFAren pertsonal urria ez da gauza mendian izan ohi den delinkuente-andana kontrolatzeko, eta Ertzaintzako kideek, sarri, ez dute jakiten nola jokatu halakoetan.

Dakizuenez, datozen egunetako kondizioetan Kantauri aldea izaten da mendebaldeko Europa atlantiko osoan xamurren irauten duen eskualdea, eta bertan biltzen da kontinente osoko hegazti-populazioen frakzio handi bat. Izan ere, kontinentea bera ez ezik, Iberiako meseta eta Ebroren ibarra ere hormatuta baitaude.


Eskaera hau aintzat izango duzuelakoan, jaso gure agurrik beroena,


Rafael Saiz Elizondo
Itsas Enara Ornitologia Elkartea - Lehendakaria

Lertxunak Zarautzen

Berriemailea: Rafa Saiz Elizondo

Abenduaren 15ean, goizeko 9:05etan, 39 lertxunek (Grus grus) osatutako bandoa Inurritza gainean. Ipar-ekialdetik agertu eta padura gainean buelta bat eman dute. Ezin izan dut gehiago geratu begira, baina azken unean itsasora bueltan zihoazela zirudien. Hotza eta euritsua, inoiz elur-malutaren bat edo beste botatzen.

Grullas sobre Orio-Aia

Informa Héctor Gonzalez Arzelus:

Ayer por la noche pasaron muchas grullas sobre el alto de Orio, se escuchaban sus trompetazos.

2009-12-10: grullas sobre Andoain

Nos informa Mikel Alfonso:

Anoche mientras contemplaba estrellas cerca de Andoain, se escuchaba paso casi constante de grulla, una gozada.

Plaiaundiko egoerak kezkatuta, prentsara atera dira Itsas Enara, SEO/BirdLife eta Aranzadi

Irungo Udalaren jarrera negatiboaren aurrean, prentsa-ohar hau kaleratu zuten joan den asteazkenean, hilak 2:


SEO/BirdLifek, Itsas Enara Ornitologia Elkarteak eta Aranzadi Zientzia Elkarteak beren kezka erakutsi dute Irungo Udalak Txingudiko Natur Baliabideak Babestu eta Antolatzeko Plan Berezian jasotako konpromisoak betetzen ez dituela eta, eta uste dute Udalak ez lituzkeela bere ahaleginak Plaiaundin diren kirol-instalakuntzak sendotzera bideratu behar, baizik eta bertatik beste norabait eraman behar lituzkeela, han egiten diren jarduerak Plaiaundiko Parke Ekologikoa natura-gune babestu moduan babestearekin eta kontserbatzearekin bateraezinak baitira.




Azken hilabeteotan hainbat lan ari dira egiten Plaiaundiko Parke Ekologikoaren barne diren kirol-instalakuntzak egokitzeko eta sendotzeko, alegia, Natura 2000 sarera eta Ramsar-ko Hitzarmenera bildutako hezegunea leheneratzeko eta kontserbatzeko helburua duen Txingudiko Natur Baliabideak Babestu eta Antolatzeko Plan Bereziak babestutako eremuaren barruan.

Plan Berezia lau erakunderen interesak bultzatuta idatzi zen (hots, Eusko Jaurlaritzak, Gipuzkoako Foru Aldundiak, Irungo Udalak eta Hondarribiko Udalak bultzatuta), Txingudiko badia kontserbatzeko tresna moduan oro har, baina bereziki bertako paisaia eta balio naturalak, betiere ekosistemen dinamika eta egitura sustatuta. Halaber onartu zen herritarrek lekuaz aise gozatzeko konpromisoa, betiere inguru naturalarekiko begirunea oinarri zuen aisia-erabileraren alde eginik. Era berean, natur ondarearen ezagutza sakona erraztuko zuten ikerketa- eta ingurumen-hezkuntzako jarduerak sustatu eta programatuko zirela aipatzen zen han, Naturari ezinbestean zor zaion begirunea helburu harturik.

Bereziki azpimarratu zituen Plan Berezi hark padura berreskuratzeko lanak, eta Babes Bereziko Lur moduan sailkatu zuen Plaiaundiko lurrak, haientzako lehentasuneko erabileratzat ezarriz kontserbazioa, ikerkuntza, inguruaren irakaskuntza eta kontrolpeko aisia. Gainera, jatorrizko morfologia, lurzorua, hondoak, drainatzea nahiz landaretza nabarmen eralda lezaketen ekintza oro berariaz debekatu ziren, bai eta fauna-komunitateei eragozpenak eragin liezazkieketenak ere. Kirol-instalakuntzak bertatik beste norabait eramatea gomendatu zuen Plan Bereziak, orobat.

Irungo Udalak, kirol-instalakuntzak handik eraman beharrean, sendotzeari ekin dio inguruko balioei gaizki eragiten dieten hainbat lan bultzatu baititu.

Kirol-instalakuntzen sendotze-lan horiek Plaiaundiko balioei eragiten dieten efektuak aldez aurretik ondo balioetsi behar ziren, Habitatei buruzko Europako Arteztarauaren 6. artikuluak dioen bezalaxe.

Komeni da gogoraraztea Babestutako Inguru Naturalari kalterik eraginez gero ez dagoela proiektua onesterik, ez bada salbuespen­errejimen korapilatsu eta garestira jota. Horregatik eskatu nahi diogu Irungo Udalari saia dadila Plaiaundiko kirol-instalakuntzak lekuz aldatzen eta ez ditzala sendotu.

Itsas Enarak GFAko Bide Azpiegituretako departamentuari eginiko eskaera

GIPUZKOAKO FORU ALDUNDIA
Bide Azpiegituren Departamentua

Jaun-andre horiek:

Azken urteotan Gipuzkoan egiten ari diren hainbat obratan, trafikoak eragiten duen zarataren aurkako pantailak ezartzen ari da zuen departamentu hori bide bazterretan, besteak beste, gai plastiko gardenezko eredu bat. Dagoeneko Zumaiako saihesbidean eta A-8 autobidean, Arratzain inguruan, aurkitu dugu.

Gure elkartea oso kezkaturik dago eredu hori dela eta, aspaldi samar antzeman baitzaio hegaztientzako aparteko arriskua ekartzen duela; guk geuk ere istripu ugari hauteman dugu honezkero Zumaian, eta zalantzarik ez dugu Arratzainen are ugariago izango direla ez badira lehenbailehen erretiratzen bertatik.

Honen bitartez eskatu nahi dizuegu pantaila horiek BEREHALA erretira ditzazuela ipinita dauden tokietatik eta ez dezazuela berriro inongo bide bazterretan ipini, ez eta beste administrazioei nahiz partikularrei ipintzen utzi ere. Halaber, zuek esleitzen dituzuen proiektu guztien baldintza teknikoetan berariaz debeka dezazuela halakorik ezartzea. Izan ere, sobera frogatuta dago horiek dakarten arriskua, badira motibo hori dela eta atzera botatako proiektuak, eta Espainian aspaldi dira debekatzen hasiak hainbat deialdi eta Ingurumen Eraginaren Deklaraziotan. Horra adibide batzuk:

http://www.mma.es/portal/secciones/biodiversidad/desarrollo_rural_paisaje/fragmentacion_rural/pdf/prescripciones_pasos_vallados.pdf
http://www.invenia.es/boe:indilex:2007.17765

http://www.boe.es/aeboe/consultas/bases_datos/doc.php?coleccion=indilex&id=2003/13004&txtlen=121
2000.03.15ko EAOn argitaratutako “RESOLUCIÓN de 9 de marzo de 2000, de la Secretaría General de Medio Ambiente, por la que se formula declaración de impacto ambiental sobre el estudio informativo de la autopista de circunvalación de Madrid M-50. Tramo: N-IIÐN-IV, de la Dirección General de Carreteras del Ministerio de Fomento.”

2004.11.22ko EAOn argitaratutako Medinaceli-Soria autobideari dagokion Ingurumen Eraginaren Deklarazioa

2008.07.21eko EAOn argitaratutako “ORDEN ARM/1781/2008, de 22 de mayo, por la que se formula declaración de impacto ambiental del proyecto «reordenación de accesos, duplicación de calzadas y creación de vías de servicio N-110 pk 258, 800 y 262,200 Ávila)»”

2009.01.28ko EAOn argitaratutako “Resolución de 30 de diciembre de 2008, de la Secretaría de Estado de Cambio Climático, por la que se formula declaración de impacto ambiental del proyecto Ampliación con tercer carril por calzada y vías de servicio. Autovía del Norte A-1. Tramo: enlace del RACE-enlace sur de San Agustín de Guadalix, Comunidad de Madrid.”

2009.03.06ko EAOn argitaratutako “Resolución de 16 de febrero de 2009, de la Secretaría de Estado de Cambio Climático, por la que se formula declaración de impacto ambiental del proyecto Conexión de las carreteras N-120 y N-536 en el Barco de Valdeorras, Ourense. Términos municipales Barco de Valdeorras, Carballeda de Valdeorras, Rubiá, provincia de Ourense.”

COST 341 projektu europarraren azken txostenaren 6. eta 7. kapituluak: http://www.mma.es/secciones/biodiversidad/desarrollo_rural_paisaje/fragmentacion_rural/pdf/parte4_cost341_inf%5B1%5D.pdf

Gure aldetik, nahi duzuen edozein kontsultari erantzuteko eta zalantzak argitzeko prest gauzkazue. Eskaera hau aintzat hartu eta erantzun egokia emango diozuelakoan, jaso gure agurrik beroena.

Donostian, 2009ko azaroaren 2an